دەتەوێت دوای مردنت نوێژت لەسەر بکرێت؟! 

.....

ئەی ئەو کەسەی دەترسیت دوای مردنت تەرمەکەت نەشۆردرێت، یان نوێژت لەسەر نەکرێت و بە بێباوەڕ بناسرێیت؛ ئامۆژگاری ئێمە بۆ تۆ سادەیە: « دژایەتی ئیسلام و قورئان و موسڵمانان مەکە» .

ئیسلام ئایینێکی مەزن و بەهێزە؛ مێژوو سەلماندوویەتی هەرکەسێک بیەوێت ململانێی بکات، نەک هەر ناتوانێت، بەڵکو شکۆ و نرخی خۆی لەدەست دەدات.

 ئەوەی بیەوێت بەرنامەی خودا بە کەم بنرخێنێت، بێگومان لە ژیان و لە مردنیشیدا بێ نرخ دەبێت.

بەڕاستی هاودژییەکی سەیرە !

جێگەی تێڕامانە؛ تۆیەک لە کاتی ژیانتدا موسڵمانان بە "دواکەوتوو و کۆنەپەرست" ناوبەریت، کەچی چاوەڕێ بیت دوای مردنت هەمان ئەو خەڵکە بەسەرتدا هەڵبدەن و وتاری درێژت بۆ بنووسن لە باسی گەورەیی و مەزنێتیدا!

چۆن دەبێت لە ژیانتدا بۆ جارێکیش بە ملکەچییەوە نەهاتبیە ناو ڕیزەکانی مزگەوت، کەچی ئێستا بتەوێت موسڵمانان پۆل پۆل لەسەر تەرمەکەت بوەستن و نوێژی جەنازەت بۆ بکەن؟

 تێگەیشتن لە چەمکی بێباوەڕی

هەندێک کەس هەموو تەمەنیان بە کردار و گوفتار دژایەتی ئیسلام دەکەن، کەچی کاتێک پێیان دەوترێت "بێباوەڕ" تووڕە دەبن! لەکاتێکدا "کافر" بوون تەنها وەسفکردنی حاڵەت و بیروباوەڕی کەسەکەیە نەک جنێو و سوکایەتی.

ئەگەر پێت وایە بێباوەڕی ناشرینی و سوکایەتییە، دەی لە ژیانتدا لێی دوور بکەوە و پابەندی ئاداب و بنەماکانی ئیسلام بە.

بزانە.. ئەگەر موسڵمانێکی ڕاستەقینە بیت، هیچ کەسێک نە مافی ئەوەی هەیە و نە جورئەتی ئەوە دەکات لە مزگەوت وەدەرت بنێت یان نوێژت لەسەر نەکات.