ئێوە ڕقتان لە دروشمەکانی ئیسلامە ئەگینا دڵسۆزی هەژاران نین

ئێوە ڕقتان لە دروشمەکانی ئیسلامە
ئەگینا دڵسۆزی هەژاران نین

.....

الحمد لله والصلاة والسلام علی رسول الله ، ٲما بعد :

بەڕاستی کەناڵەکانی ڕاگەیاندن زیانی زۆریان گەیاندووە بە بیروباوەڕ و ڕەوشت و کلتوری ئەم گەلە موسڵمانە ، بەهەموو جۆرێک هەوڵ دەدەن خەڵکی لە دینداری و عیبادەتی خوای گەورە دوور بخەنەوە ، چونکە بڵاو بوونەوەی دروشمەکانی ئیسلام بێزار و بێتاقەتیان دەکات ، وە هەندیک لەو بابەتانەشی کە ماوەیەک جارێک وەکو دڕک دەچێت بەچاوی مولحید و بێدین و عەلمانیەکاندا بریتیە لە بابەتەکانی :

 [ (حەج و عومرە) و ( قوربانی ) و ( مزگەوت دروست کردن)  ]

بۆیە هەر ماوەیک جارێک کەسێکی ناڕۆشنبیر و دڵ پیس و بۆگن دێننە سەر شاشەکان بۆ ئەوەی تانە بدات لەم شەریعەتە پاک و بێ گەردە .

هەر جارێک بە ناوێک و بە بۆنەیەکەوە دێنە سەر شاشەكانی تەلەفیزیۆن و دەست دەکەن بە ڕشانەوە بەرامبەر دروشماکانی ئیسلام ، وە ئەمانەش چەند جۆرێکن و بەچەند شێوازێک قسە دەکەن :

جۆرێکیان دەڵێن : ( لەبری دروست کردنی مزگەوت بڕۆن قوتابخانە دروست بکەن خۆ تەنها کۆمەڵگا پێویستی بە مزگەوت نیە بەڵکو ئاین هانمان دەدات بۆ ئاوەدانکردنەوە  لە هەموو ڕووەکانەوە  ) .

دەڵێین : بەڵام ئەم کەسانەی ئەڵێی بیریان چووە کە هەرخۆيان و هاوشێوەکانیان بوون دەیان گووت : ئێوەکارتان بەسەر کۆمەڵگا و ژیانی خەڵکەوە نەبێت چوونکە ئاین پەیوەندی نێوان تاکەکانە بەخواوە و پەیوەندی تاکە کەسیە .

ئەی بیرتان چوو دەتان ووت ئێوە کارتان نەبێت بەسەر کۆمەڵگاوە و ئێمەش کارمان نیە بە مزگەوتەکانی ئێوەوە ئیتر ئێستاش بۆ دەم له مزگەوتەکانیشمان ناپارێزن و دەڕشێنەوە پێیدا ؟!

 ئاخۆ ئەگەر ئەمانە موسڵمان بن بۆ دەبێت ڕقیان لە مزگەوت ببێتەوە و داوای ئەوە بکەن دروست نەکرێت لە کاتێکدا  مزگەوت :

لە ئیسلامدا جێگا و پلە تایبەتی خۆی هەیە و ماڵی لەخواترسانە و جێگای پەرەستن و ڕەوشتی جوان و پتەو کردن ئارامی کۆمەڵگا و پاراستنی شیرازەی خێزانەکانە .

جۆرێکی دیکەیان دەڵێن : (قوربانی مەکەن خودا دەوڵەمەندە و پێویستی بە قوربانی ئێوە نیە یان دەڵێن : سەربڕینی ئاژەڵان بێ ڕەحمیە ) .

دەڵێین : بەڵێ بێگومان پەروەردگارمان دەوڵەمەندە و پێویستی بە قوربانی ئێمە نیە بەڵکو بەتەنها قوربانی نا ، پێویستی بە هیچ عیبادەتێک نیە  بەڵام ئێمە لەبەر هەژاری و پێویستیمان بۆلای خوای پەروەردگار بۆیە قوربانی دەکەین بۆ ئەوەی ئەو پەروەردگارە دەوڵەمەندە لە بەخشش و ڕەحم و بەزەیی و عاطائی خۆی بێ بەشمان نەکات .

پاشان دەربارەی بڕگەی دووەمتان کە دەڵێن :( قوربانی بێ ڕەحمیە بە ئاژەڵان )

دەڵێن ئەو ئاژەڵانە پەروەردگاری ئێمە دروستی کردووە بۆ ئەوە کە ئێمە سوودی لێ ببینین و سەری ببڕین ئەمەش لە پەیڕەوی ئاینی ئێمەدە هیچ کێشەیەکی تێدا نیە بەڵام ئێوەیەک کە دەڵێن سەربڕینی ئاژەڵ بێ ڕەحمیە ئەی ئێوە لە ڕێستۆرانت و چێشتخانە و گەشت و سەیرانەکانتاندا چی ئەخۆن ؟ باشە تۆ بڵێی ئەو گۆشتانەی ئێوە دەیخۆین هی ڕووەک و دار و درەخت بێت ؟!

بۆیە ئەمە جگە لە چاو هەڵنەهاتن بە دروشمەکانی ئیسلامدا هیچی دیکە نیە .

وە کۆمەڵێکی دیکەیان دەڵێن : ( ئێوە مەڕۆن بۆ حەج و عەمرە پارەکاتان بدەن بە هەژارانی وڵاتی خۆمان خێرترە  یان دەڵێن : پارەی حەج و عەمرەکانتان بدەن بە نەخوشخانەکان  خێرترە  یان دەڵێن : ئێوە پارەی ئەم وڵاتە دەدەن بە عەرەبی سعوودیە و زیان لە ئابووری وڵات دەدەن ) .

 پێیان دەڵێین : دیاری کردنی ئەوەی کامە کارە خێر و کامەی باشترە ئەوە ئیشی ئێوە نیە بەڵکو ئەوە کارێکە پەیوەستە بە ئاینی ئیسلامەوە و پەروەردگار و پێغەمبەری نازدارمان صلى الله عليه وسلم بۆیان ڕوون کردوینەتەوە .

هەر بۆیە ئێمە دەزانین کە حەج کردن یەکێکە لە پایەکانی ئیسلامەتی و لەپێش هەموو خێرێکەوەیە بۆ کەسێک کە توانای هەبێت .

وەهەروەها عەمرەکردن یەکێکە لە خێرە هەرە مەزنەکان و هۆکاری پاکبوونەوەیە لەتاوان چۆن دەبێت موسڵمانان وازی لێ بهێنن ؟!

پاشان ئەگەر موسڵمان بەقسەی ئێوە بکەن و واز بهێن لە حەج و عەمرە یەکێک لە دروشمەگەورەکانی ئاینەکەمان دەبێت لەدەست بدەین بە بیانووی یارمەتی فەقیر و هەژار کە ئەمەش هەرگیز ناکرێت و نای بینن .

پاشان ئایا کێیە کە پارە دەدات بە نەخۆشخانەکان و فەقیر و هەژاران ئایا کەسانی دڵ پیس و عەلمانی و بێدینەکانن یان کەسانی دیندار و ئەوانەن کە دەچن بۆ حەج و عەمرە ؟! بێگومان کۆمەڵێ دووەمە .

دواتر  دەڵێیین : ئێمەش حەقی خۆمانە بپرسین :

ئەی باشە ئێوەی پارەی پەخشە ڕاستەوخۆکانتان بۆ نادەن بە فەقیر و هەژاران و واز بهێنن لە ماندوو کردنی مێشکی موسڵمانان ؟ !

ئەی باشە ئێوە بۆ ئەو هەموو دەفتەرە دۆلارە خەیاڵیەی دەیدەن بە دۆبڵاج کردنی فیلمەکان و زنجیرە بەرەڵاییەکان بۆ تێکدانی ڕەوشت و ئەخلاق و بیروباوەڕی کۆمەڵگا بۆچی ئەم پارەیە بە هەژاران و نەخۆشخانەکان نادەن ؟ !

ئەی باشە ئێوە پارەی ئاهەنگ و بۆنە و یادەکانی خۆتان  کە کردووتانە بە مایەی نەهامەتی بۆ ئەم خەڵکە داماوە  بۆ نایدەن بە هەژاران و نەخۆشخانەکان ؟!

کاتێکیش دەڵێن : (ئێوە پارەکەتان مەدە بەعەرەبەکانی سعوودیە سعوودیە )

دەڵێین : ئەم وتەیە وتەی کەسێکی زۆر گەمژە و نەزانە چوونکە ئەو پارەیە بۆ عەرەبەکانی سعوودیە نیە بەڵکو ئەوە پشکی کۆمپانیاکانی ناوخۆ  و ڕسووماتی حکومەتی هەرێم و پشکی کۆمپانیاکانی فڕۆکەوانی چەندینی ئەرکی دیکەیە و تەنها بەشێکی کەمی بۆ ئەو وڵاتەیە پاشان ئەو وڵاتە باشترین خزمەت پیشکەش دەکات بە میوانەکانی لە کات و ساتی حەج و عومەرەدا هەر بۆیە ئەگەر ئەندازەیک پارەیان دەست بکەوێت وەکو هەروەڵاتێکی دیکە کە گەشتیاریان هەیە هیچ کێشە و عەیبەیەکی تیا نیە .

بەڵام دیسان مافی خۆمانە بپرسین ئایا ئەمە خەمخۆریە بۆ ئابووری کوردستان و دڵسۆزیتانە بۆ هەژاران یان ڕقبوونەوەیە لە دروووشمەکانی ئیسلام و دژایەتی کردنیەتی ئەگینا دیسان لێ تان دەپرسین :

ئەی بۆ وتەیەکتان نیە بۆ هاوەڵەکانی خۆتان کاتێک بەرەڵاکانی ئەوروپا و ئەلبانیا و وڵاتانی عەرەبی دێنن بۆ کۆنسێرت و ئاهەنگەکان ؟

 باشە بۆ ناڵێن : پارە خەیاڵیەکەی کۆنسێرتی هەفتەی ڕابردووی سلێمانی بدەن بە نەخۆشخانەی هیوا و مەیدەن بەو بەرەڵاییە ؟

ئەی باشە پارەی گەشت و سەیرانەکانی تورکیا و ئەوروپای خۆتان بۆ نادەن بە نەخۆشخانەکان و هەژاران ؟

ئەی بۆچی بەخەڵکیتان نەوەت مەچن بۆ سەیرکردنی مۆندیال و گەشتی ڕوسیا و بیدەن بە نەخۆشخانەی هیوا ؟

ئەی باشە ئەو هەموو پارەیەی کە سەرفتان کرد لە هەفتەی بەرەڵای کە ناونرابوو بە هەفتەی نمایشی جلوبەرگ  ، ئەو پارە خەیاڵیە بۆ نادەن بە هەژان و بە نەخۆشخانەکان ..

هەر بۆیە لە کۆتاییدا دەڵێیین :

ئەی موسڵمانی خۆشەیست دڵنیابە کە ئەم بەناو ڕۆشنبیر و نووسەرانە نە دڵسۆزی کۆمەڵگاكانن و نە خەمخۆری هەژاران و نە فرمێسکەکانیان بۆ نەخۆشخانەی هیوایە بەڵکو تەنها ڕاستیەک هەیە و دەبێت بیزانین ئەویش بریتیە لەوەی کە [ئەمانە چاویان بە درووشمەکانی ئیسلامدا هەڵنایەت و دژایەتی کردنی ئیسلام تاکە پاڵنەریانە]

وە مژدەشمان بۆیان بریتیە لە وتەی پەروەردگارمان : [هُوَ الَّذِي أَرْسَلَ رَسُولَهُ بِالْهُدَىٰ وَدِينِ الْحَقِّ لِيُظْهِرَهُ عَلَى الدِّينِ كُلِّهِ وَلَوْ كَرِهَ الْمُشْرِكُونَ] ( سورة الفتح : 28 )

وە مژدەشمان بۆ موسڵمانان بریتیە لەوەی کە دلنیابن ئەم بێدین و مونافیقانە هەرچەندە هەوڵی کپ کردنی و لەناو بردنی نوری پەروەردگار بدەن بە فووی دەمیان ئەوا هەرگیز ناتوان [يُرِيدُونَ لِيُطْفِئُوا نُورَ اللَّهِ بِأَفْوَاهِهِمْ وَاللَّهُ مُتِمُّ نُورِهِ وَلَوْ كَرِهَ الْكَافِرُونَ ] ( سورة الصف : 8 ).

بەڵام ئەوەی کە گرنگە وەکو موسڵمان ئاگاداری بین بریتیە لە پارێزگاری کردن لە ئاینەکەی خۆمان و خۆڕازاندنەوە بە فەرمانە ئاکارە جوانەکانی .

داواکارم لە پەروەردگار کە ئێمە و هەموو موسڵمانان بپارێزێت لە هەموو خراپەیەک و دینەکەی خۆی سەربخات بەسەر هەموو ڕێباز و دینەکانی دیکەدا.

وصلى الله وسلم على نبینا محمد وعلى آله وصحبه وسلم .

ئامادەکردنی

زانا سليم كەلاری

٨-٩-٢٠١٨